【不讀不回，其實你裝通訊軟件嚟為乜？】
之前分享過，「已讀不回」係我最憎最憎嘅一件事，你話無聊吹水唔覆都算，明明問緊正經嘢、一班人約緊一件事，硬係可以已讀不回，最衰係補多個電話俾你，你都唔聽。其實，你點解仲要逗留喺個group入面？唔鍾意、唔想再理班朋友，點解唔quit group？
更難頂嘅係，不讀不回，唔讀咪可以扮睇唔到囉？然後，用香港人最擅長嘅一個解釋：「忙」就兜到一切。明白有時唔可以即刻覆到你，但當對方聲稱幾日忙到電話都冇拎起、覆一句嘢，而你不斷見到佢在線上、打機不斷升緊lv，話忙到冇拎起過個電話？Come on，請唔好當人傻架啦。
我唔係好明白，點解啲人個電話可以有成千上萬個未讀信息。曾有朋友話過我，點解可以覆得咁快？其實，我覺得呢啲嘢真係人與人之間基本尊重，要覆都係要覆。如果你根本唔想讀唔想理，你可以quit group或block埋對方，甚至如果你忙到想自閉唔同人溝通，不如Delete咗啲程式佢，Signal又好Telegram又好Whatsapp又好Messenger都好，喂都佔容量架，人哋成日send嘢俾你，唔睇唔讀，就算mute個群組都煩啦係咪？
最近做緊份臨時工，直接間接都同疫情有少少關係，真係可以影響到一班人健康、會唔會變成另一個「群組」，但係出動到電話喇，都係唔覆好忙好唔得閒。上一分鐘話佢去緊廁所、下一分鐘話佢開緊會、等多一個鐘話佢走咗。同事好嬲，一收線就大鬧，都講得好啱：「得就一個字，唔得就兩個字，你要覆人先得架？！冇人迫你，但得唔得你都覆一覆丫！」
真係，得定唔得、去定唔好、好定唔好，駛嘥你幾多時間？
啲人就係鍾意唔覆，扮睇唔到當冇咗件事，你知我知，唔睇，個信息都仲喺度，件事都未必逃避就可以解決。
科技發達好似拉近人與人之間距離，同時又將人愈拉愈遠，呢啲程式出現，變相係令人習慣有咩就逃避問題，然後一個「忙」字就可以解釋到所有嘢。
唔想出席一個聚會？好忙呀冇睇到，但一班人都係等緊你覆。
唔想面對感情問題？好忙呀冇睇到，但對方都係等緊你一個答案。
唔想理公司嘢？好忙呀冇睇到，但你最後都會俾老細捉去問。
當你覺得自己忙到極致，任何人都可以不讀不回，沾沾自喜呢個藉口可以樂得清閒時，他朝一日發生咩事，你要喺果成千上萬message搵返你錯失過嘅嘢，到你需要人時，人哋已經唔會再想理你。
呢啲人如果真係咁抗拒社交，我衷心建議你做一樣嘢：
咁忙，揼撚咗個電話佢啦，你唔會有時間用架喇。
✨ 網店正式開張！新張期內貨品低至$5！請即睇：https://bit.ly/3qLPkpk
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
Search